Welkom by Klein Karoo Voetslaanklub

Die klub is ‘n oop klub wat lidmaatskap toestaan aan enige persoon in Suid-Afrika wat in voetslaanaktiwiteite belangstel (ongeag waar die persoon woon), die bepalings van die grondwet van die klub aanvaar en daarvolgens optree. Persone wat in lidmaatskap belangstel, moet ‘n aansoekvorm voltooi wat by die sekretaresse of verder ondertoe op hierdie webblad verkry kan word. Die klub verwelkom deelname van belangstellende nie-lede aan sy aktiwiteite, waar die reëling geld dat ‘n nie-lid met die eerste uitstappie gratis kan deelneem, maar daarna ‘n deelnamefooi moet betaal per aktiwiteit wat hy/sy

meemaak. Die deelnamefooi word jaarliks hersien. Klublede kry altyd voorkeur by aktiwiteite waar daar ‘n beperking op getalle is. 

Die bestuurskomitee van die klub stel jaarliks aan die begin van die jaar ‘n program op van aktiwiteite wat gedurende die jaar sal plaasvind. Elke aktiwiteit is toegeken aan ‘n organiseerder wie se kontakbesonderhede op die program verskyn. Die beleid van die klub is verder dat enige lid vry moet voel om ‘n aktiwiteit te reël op ‘n datum wat nie bots met ‘n datum op die program nie en dan ander klublede daarby te betrek – die komitee sal die persoon help om die inligting na alle lede toe deur te gee. Die huidige jaarprogram is hier onder in die lys van dokumente beskikbaar.

Die bestuurskomitee probeer om die program te balanseer met aktiwiteite wat soveel voorkeure as moontlik bevredig, dus word korter en langer, makliker en moeiliker, nader en verder aktiwiteite in die vorm van dagstappe, naweekstappe (2 dae), naweke met dagstappe, en langer stappe (4 tot 8 dae) gereël. Aktiwiteite op die program kan op enige plek in Suider-Afrika wees – dit is nie beperk tot die Wes-Kaap nie.